Dende 1973 estudiando, divulgando e defendendo o patrimonio natural galego

sghn@sghn.org

MARCHA MONTE PINDO Pola declaración de Parque Natural

Sábado 14 de abril ás 12:00 horasSaída: Área recreativa do Ézaro (Dumbría)Remate: Praza da Solaina (O Pindo)

Outros datos de interese: Posto informativo da Asociación Monte Pindo Parque Natural na Praza da Solaina activo desde as 11:00 horas. Percorrido accesible para todas as idades e condicións físicas (por estrada asfaltada). Duración aproximada: 32 minutos. Distancia: 2,7 quilómetros.

Servizo de orde propio para garantir o bo transcurso da marchaXantar popular baixo carpa con polbo á feira, churrasco e carne ao caldeiro. A marcha estará amenizada por grupos de música tradicional. Convocatoria pertinentemente comunicada á Subdelegación de Goberno.

Para máis info, chama ao 655 56 43 72 ou escribe ainfo@montepindo.org

ADEGA E SGHN SOLICITAN A CREACIÓN DUN PARQUE NATURAL NA ÁREA DO MONTE PINDO

A proposta presentarase no Observatorio Galego da Biodiversidade e conleva enormes beneficios ecolóxicos e económicos para a zona proposta.

Profesores universitarios galegos, investigadores e representantes ecoloxistas veñen de presentar  ante o Observatorio Galego da Biodiversidade un documento que recopila o enorme interés científico e ambiental da área natural do Monte Pindo e solicitan a creación dun novo Parque Natural, que sería o séptimo existente en Galiza.

O Monte Pindo no Concello de Carnota presenta 8 especies vexetais protexidas pola lexislación galega, 5 hábitats protexidos pola Directiva Europea 92/43/CE e 12 especies de fauna protexidas polos distintos Libros Vermellos da Fauna do Estado Español, según o documento elaborado que foi revisado na súa parte botánica por Xavier Amigo Vázquez, Profesor de Botánica da USC e, na súa parte faunística por Pedro Galán Regalado, Profesor de Zooloxía da UAC. Ademais destácase a importancia xeolóxica dunha área que está clasificada Punto de Interese Xeolóxico do estado español (PIG-C-115) polo seu abrupto relevo de rochas graníticas que acada o 628 metros de altitude na Moa a pesar de situarse á beira do mar.

A isto hai que engadir abundantes restos patrimoniais medievais e o seu carácter de lugar simbólico que Otero Pedrayo denominou como “Olimpo Celta” no que as rochas adquiren significados míticos como a coñecida como “O Guerreiro” entre outras.

O abrupto e rochoso do terreo fai que estea no seu interior por completo despoboado xa que as aldeas están situadas nas beiras do monte. Tampouco existen aproveitamentos económicos destacables a parte do turismo no interior do Monte Pindo.

O documento será presentado no Observatorio Galego da Biodiversidade que é o organismo consultivo axeitado para levar adiante esta iniciativa. Este organismo dependente da Dirección Xeral da Natureza da Consellería de Medio Rural, leva sen embargo sin reunirse dende hai 2 anos nos que Partido Popular chegou ao governo, sendo a última reunión presidida polo anterior Director Xeral de Conservación da Natureza da Xunta do bipartito. Por estes motivos ADEGA e SGHN solicitan que o Observatorio Galego da Biodiversidade se reuna o antes posible para estudar a solicitude de creación deste Parque Natural, beneficioso ao mesmo tempo para o medioambiente e para os habitantes do Norte do Concello de Carnota.

A concentración de numerosos valores naturais nun escaso territorio e máis a súa idoenidade económica leva a propor a figura de Parque Natural para protexer a esta zona de actuacións inaxeitadas ou alteracións que podan perturbar os seus actuais valores naturais. A figura de Parque Natural contempla destacadas inversións turísticas e ambientais e mesmo sociais non só no territorio do futuro Parque senón tamén na área de amortecemento que contemple as zonas poboadas que rodean ao monte.

Estas importantes inversións así como a facilidade da promoción turística dun parque natural tan destacado suporá, no caso de facerse, un auténtico revulsivo económico  na zona. Só hai que recordar que o Parque Natural de Corrubedo é hoxe un dos lugares máis visitados de Galiza e ademais unha das principais fontes de riqueza para os habitantes desa área.