logo

Dende 1973 estudiando, divulgando e defendendo o patrimonio natural galego

sghn@sghn.org

line decor
  INICIO
line decor

 

 


 
 
 

 

No Tour de Francia demostrou que Floyd Landis era un tramposo. Gañou un galego

Na Limia demostra quen xoga sucio coas augas. Gañaremos os galegos (e os portugueses)

Versión en castellano

Santiago de Compostela, 19-11-2014

Tres días despois de rematar o Tour de Francia de 2006, saltaba aos medios de comunicación que o gañador Floyd Landis dera positivo por testosterona no control anti-dopaxe dunha das etapas reina. Landis proclamou a súa inocencia dicindo que estaba limpo e que eses niveis tan altos de testosterona eran naturais en él. O seu amigo Lance Amstrong (hoxe tramposo confeso e desposeído dos seus sete Tours) defendeuno con vehemencia.

Pero dende o primeiro momento o experto de SGHN en isótopos estables estivo 100% seguro de que Floyd Landis era un tramposo e, ademais, un mentireiro. Cómo podía estar tan seguro? Pois porque na primeira nova difundida en TV indicouse que o positivo baseábase nunha análise GC-IRMS. Esas siglas case xeroglíficas indicaban aos expertos nesa técnica que no laboratorio atoparan testosterona sintética nos ouriños de Landis. Pero, cómo puideron diferenciar a testosterona natural da sintética? Pois porque a súa composición isotópica é diferente aínda que as moléculas sexan aparentemente iguais cando se analizan con outras técnicas.

Qué ten que ver iso coa Limia? Pois que a Confederación Hidrográfica del Miño-Sil (CHMS) encargou en 2012 un estudio ao Prof. Delgado Huertas do Laboratorio de Bioxeoquímica de Isótopos Estables do CSIC en Granada para averiguar a(s) orixe(s) da contaminación por nitratos nas augas do río Limia, baseándose na composición isotópica do nitróxeno e o osíxeno dos nitratos, que é diferente segundo a súa procedencia.

Ao facerse público que a CHMS xa recibira o estudio, SGHN solicitou unha copia do mesmo ao abeiro da lexislación que garante o acceso á información ambiental e a CHMS facilitouno en soporte informático. Velaquí en primeiro lugar a transcripción textual das conclusións do informe do CSIC e, de seguido, unha análise estatística dos datos feita polos expertos de SGHN que a combinaron cunha interpretación xeográfica, hidrográfica, demográfica e de carga gandeira.

Os resultados son moi reveladores...

Varamento de Cifio de Blainville  Mesoplodon densirostris

Ferrol, 11-11-2014

...E o presente máis fresco é o varamento dun Cifio de Blainville Mesoplodon densirostris, Zifio en castelán e Cifio para nós, con “c” de curiosidade, de desexo de coñecer e investigar a unha das máis estrañas familias do noso planeta, a dos cifios, palabra que ten un significado alusivo ó fociño estreito que estes animais presentan. Esta división reúne a unhas vinte especies, con distintos tamaños,

Polas nosas costas pódense atopar os xéneros Mesoplodon e Ziphius principalmente, aínda que tamén algunha especie de Hyperoodon, máis raro non obstante. No noso Museo temos algúns exemplares de cifios actuais, todos eles excepcionais e cunha historia detrás, máis o que nos ocupa neste intre é o Cifio de Blainville. Hai que deixar claro en primeiro lugar que os cifios non son baleas, senón odontocetos, unha suborde de cetáceos que posúen dentes, aínda que no exemplar que apareceu estos días non se ven, xa que nas femias non emerxen; esta especie posúe tan só un par de dentes, enormes e incrustados no arqueado maxilar inferior, tan visibles nos machos que sobresaen da mandíbula superior.

Máis...

 

Unha Limia Limpa é posible
I e II Xornadas de limpeza e recuperación da Veiga de Gomareite

Vilar de Gomareite (Vilar de Barrio), 4 de outubro de 2014

Si en 2013 a Sección Antela de SGHN celebraba o día das aves dun xeito diferente, traballando na parcela de SGHN en Vilaseca para recuperación de hábitat para conícora, neste 2014 seguimos con outra celebración singular, procurando a recuperación dunha parte da veiga de Gomareite, visitada asiduamente polos observadores de aves que coñecen a presenza frecuente dalgunhas interesantes especies: conícoras, píllaras, biluricos, cegoñelas, garzotas, pilros, cullereiros, ...

A xornada comenzou amosando aos participantes a situación da veiga de Gomareite sobre un mapa no que se remarcaba a antiga lagoa de Antela, da que formaba parte. Esta veiga é un lugar interesante para a fauna e flora e, despois de varios intentos, SGHN-Sección Antela conseguiu a sinatura dun acordo de custodia do territorio compartida cun gandeiro da zona. Por desgracia este lugar empregouse durante anos como vertedoiro incontrolado e caótico de todo tipo de residuos, que pouco a pouco foron restando superficie útil de terreo, tanto para o uso gandeiro como para as especies de flora e fauna, así que é preciso mellorar esta situación en dúas vertentes: recollida do lixo actual e control de novas verteduras.

Con estas consideración de seguida os voluntarios puxeron máns a obra, tendo en conta que os residuos tiñan que ser separados segundo a súa tipoloxía: escombros, forxados, vidro, pneumáticos, plásticos, madeiras e outros para a súa posterior xestión. Máis...

 

O plan de desenvolvemento sustentable da ZEPA da Limia durme o sono dos xustos

Ourense, Santiago, 07-11-2014

O Artigo 6 do Decreto 411/2009 polo que se declara a zona de especial protección para as aves da Limia, estableceu un prazo de 2 anos para que se elaborase o “Plan de desenvolvemento sustentable orientado ao fortalecemento da actividade económica, social e cultural ... que establecerá medidas de apoio e orientación tendentes ao desenvolvemento da actividade agraria en réxime sustentable, de cara a harmonizar a obtención de bens e servizos co mantemento dun estado de conservación favorable das especies e dos hábitats que as sustentan”.

Unha vez transcorrido o dito prazo de dous anos, con data 12-12-2011 SGHN solicitou á Consellería de Medio Rural (da que dependía naquel momento a D.X. Conservación da Natureza) unha copia do devandito “Plan de desenvolvemento sustentable” da ZEPA da Limia e a súa Zona Periférica de Protección. Pero case 3 anos da finalización do prazo legalmente establecido para a elaboración do “Plan de desenvolvemento sustentable” da ZEPA da Limia e a súa Zona Periférica de Protección éste non foi aínda exposto a información pública e SGHN nunca recibiu resposta a súa solicitude dunha copia do mesmo. Á vista desta situación SGHN reiterou á D.X. de Conservación da Natureza (PDF) a petición dunha copia do mesmo e información acerca dos prazos previstos para a súa tramitación legal e aprobación definitiva.

Ao contrario que o seu antecesor no cargo, a actual Directora Xeral alomenos respostou á solicitude (PDF) pero SGHN considera absolutamente insatisfactoria a resposta recibida pois, tres anos despois de rematado o prazo legal para elaboralo, as excusas para non ter feito o dito Plan son simplemente inaceptables. Malia todo, iste incumprimento legal por parte da D.X. Conservación da Natureza non é o máis preocupante da súa resposta, senón o feito de que se pretenda retrasar “sine die” a elaboración dun Plan legalmente obrigatorio e moi necesario para garantir o desenvolvemento sustentable do que aínda é un dos espacios naturais máis sobranceiros de Galicia.

Por todo iso, SGHN ven de comunicarlle á D.X. de Conservación da Natureza (PDF) que moi ao seu pesar vésena obriga de poñer en coñecemento das autoridades da Unión Europea este novo incumprimento da Directiva Aves na ZEPA de A Limia, creada en aplicación dunha sentenza do Tribunal de Xustiza da Unión Europea.

 

Electrocutadas en Ourense dúas águias reais con seguemento por satélite

Ourense, Santiago, 05-11-2014

Na páxina web do Grupo de Rehabilitación de la Fauna Autóctona y su Hábitat aparece unha nova sobre o “programa de reforzamento e recuperación da águia real en Galicia” na que se indica textualmente:

“ÁGUILAS ELECTROCUTADAS
Durante este año hemos tenido la mala fortuna de retirar los cadáveres de Ana y de Loboreira muertos por electrocución que aparecieron debajo de dos apoyos eléctrico. Dos hembras de águila real criadas en cautividad y liberadas en 2010 que se habían emparejado en dos territorios contiguos hace un tiempo y mantenían un territorio fijo, tal y como hemos comprobado gracias al emisor de satélite que portaban ambas. Sobre esto ya os informaremos con más precisión ya que nos preocupa mucho que tiempo después no se rectificaran los apoyos eléctricos.”

Á vista desta información, SGHN ven de solicitar á Dirección Xeral de Conservación da Natureza (PDF) que confirme ou desminta a exactitude de dita nova e, no caso de ser correcta:

  • Que informe a SGHN sobre a localización dos apoios eléctricos onde se electrocutaron as águias reais e as medidas adoptadas para prevenir novas mortes desta ou doutras especies de aves.
  • Que inclúa como punto da orde do día da vindeira xuntanza do Observatorio Galego da Biodiversidade a situación do “programa de reforzamento e recuperación da águia real en Galicia”.

Actualización

Cunha poboación reprodutora actual dunhas 15 parellas segundo os datos oficiais, a densidade de águias reais en Galicia é entre sete e dez veces menor que a das seguintes comunidades autónomas con densidades máis baixas segundo o censo nacional coordinado por SEO en 2009: Cantabria e Madrid.

Segundo nova de prensa da axencia EFE a raíz da pregunta de SGHN (máis...), a Consellería de Medio Ambiente ven de confirmar a morte de dúas águias reais por electrocución no Macizo Central ourensán, unha o 31 de xaneiro de 2014 en Grixoa e outra posteriormente na Venda de Bolaño. Con estas dúas perdas van xa 11 águias reais mortas en Galicia dende 2009.

Fotografía: Poste eléctrico onde se electrocutou unha das águias reais no Macizo Central ourensán. Imaxe cedida por GREFA.

O máis alarmante é que desas once águias mortas, só catro o foron por causas naturais, dúas por causas descoñecidas e as cinco restantes por causas antrópicas, entre as que destaca a electrocución pois, ademais das dúas de 2014 no Macizo Central, en 2009 xa morreran nun tendido eléctrico da Serra de Sta. Eufemia no Xurés dúas aves introducidas para reforzar a poboación desta especie. É dicir, unha de cada tres águias reais mortas en Galicia dende 2009 morreron por causa dos tendidos eléctricos: unha situación absolutamente insostible e inaceptable en opinión de SGHN, que urxe á Consellería de Medio Ambiente a adoptar de inmediato as medidas necesarias para evitar esta sangría constante na poboación dunha das especies más ameazadas de Galicia.

 

Doazón dun Tamboril de altura (Ephippion guttiferum) para o Museo de Historia Natural de SGHN

Ferrol, 03-11-2014

No mes de Outubro 2014, o Museo de Historial Natural rexistrou a entrada dun exemplar de Tamboril de altura (Ephippion guttiferum), doado por  Francisco Martínez Nebril (Barco “María Dolores”, con porto base en Cedeira).

Este peixe, atopado fronte a Cabo Prior, vive preto do fondo do mar (demersal), entre os 10 a 100 metros de profundidade, entre areas grosas e lamacentas, pedras e cascallos, nas costas africanas atlánticas e Mediterráneas, sur de España, aínda que haxa algúnha cita no norte, como esta.

Aliméntase de crustáceos, moluscos e cangrexos, presenta a curiosidade de que cando se ve en perigo, ínchase de xeito evidente deixando erectas as espiñas que posúe no abdome e nos flancos.

 

Doazón de fósiles de cetáceo para o Museo de Historia Natural de SGHN

Ferrol, 31-10-2014

Neste mes recibimos na Sección de Mamíferos Mariños  a doazón  de fósiles que veñen a sumarse á gran colección que ten o noso Museo de Historia Natural e achegan unha nova posibilidade para o importante estudo de investigación que se está a realizar por parte do noso compañeiro Ismael Miján,  partícipe do equipo de traballo internacional que leva adiante a exploración na historia evolutiva dos cifios.

Agradecemos de xeito moi especial a Benigno Romero Aneiros a doazón duns restos atopados durante a súa xornada de faena de pesca no barco “O Busi” con porto base en Cedeira. Sen este xesto tan xeneroso de achegárnolos, a investigación non podería continuar. 

O cranio que aparece na foto, no momento da súa entrega, correspóndese coa especie Choneziphius leidyi, unha das catro descubertas o ano pasado e ten unha antigüidade de entre 15 a 20 millóns de anos. Con este exemplar doado, hai neste intre oito especímenes atopados en todo o mundo, seis dos cales están no noso Museo.

Ten a particularidade de que se trata da máis grande atopada ata de agora nesta especie e presenta unas características morfolóxicas non observadas aínda nos outros exemplares. Todo elo servirá de base para un novo estudo.

 

Angelita nº 5395.4: nova mostra da falta de respecto ambiental da minería

Santiago, 28-10-2014

SGHN recibiu unha consulta da Secretaría Xeral de Calidade e Avialiación Ambiental Segundo para elaborar o “Documento de alcance do estudo de impacto ambiental do proxecto de explotación da concesión Angelita nº 5395.4" (Xermade-Lugo). Como se indica textualmente na documentación recibida polo titular do dereito mineiro "inició hace ya más de diez años las gestiones para solicitar el PASE A CONCESIÓN de parte del PERMISO DE INVESTIGACIÓN “ANGELITA Nº 5.395 Fracción “A MOURA”, a cuyo fin se presentaron los pertinentes proyectos y para los que se tuvieron en cuenta las prescripciones legales del momento. Finalmente, en el momento actual, se le requiere al promotor que se adecúen a la legalidad actual dichos trabajos con el fin de proseguir con su tramitación y conseguir su final autorización."

Pero tanto na carátula do CD recibido coa información como en diversas páxinas do proxecto, comezando pola propia portada, inclúese unha fotografía aérea na que se aprecia con total claridade que unha parte sustancial da área para a que se solicita o pase a explotación en realidade xa está explotada, infrinxindo pois:

  • A Ley 21/2013 de avaliación ambiental (e toda lexislación previa que derrogou).
  • A Directiva 85/337/CEE relativa á avaliación das repercusións de determinados proxectos públicos e privados sobre o medio ambiente, modificada pola Directiva 97/11/CE.
  • A Lei 27/2006, pola que se regulan os dereitos de acceso á información, de participación pública e de acceso á xustiza en materia de medio ambiente.
  • A Directiva 2003/4/CE pola que se establecen medidas para a participación do público na elaboración de determinados plans e programas relacionados co medio ambiente.

Nas súas alegacións ao proxecto mineiro (PDF), SGHN solicitou:

  • Que se paralice a tramitación da Avaliación de Impacto Ambiental do “Documento de alcance do estudo de impacto ambiental do proxecto de explotación da concesión Angelita nº 5395.4" (Xermade-Lugo).
  • Que se paralice a devandita explotación mineira e se precinte a maquinaria nela empregada para garantir que non se reanude sen autorización.
  • Que se proceda á apertura dun expediente sancionador ó promotor do proxecto por presuntas infraccións moi graves de:
    • A Ley 21/2013, de 9 de decembro, de avaliación ambiental.
    • A Lei 3/2008, de ordenación da minería de Galicia.
  • Que se manteña oportunamente informada á SGHN de cantas disposicións dicte a Consellería de Medio Ambiente en relación a este tema.

 

Tres organizacións medio ambientais detectan graves deficiencias
nas obras de restauración das Gándaras de Budiño financiadas pola UE

Pontevedra, 22-10-2014

A Sociedade Galega de Historia Natural (SGHN), Asociación Herpetológica Española (AHE) e Verdegaia veñen de presentar un escrito común (PDF) solicitando que se cumpra o “Proxecto de Restauración do LIC Gándaras de Budiño”, tal como se especifica no “Convenio de Colaboración entre el Ministerio de Agricultura, Alimentación y Medio Ambiente y la Comunidad Autónoma de Galicia relativo a Actuaciones de Conservación en la Red NATURA 2000” cun investimento de 1.309.513 € cofinanciado nun 70% por fondos FEDER da Unión Europea.

As organizacións presentaron dous escritos no rexistro da Xunta solicitando o seguimento axeitado e continuo das obras (executadas por TRAGSA) polos técnicos responsables do LIC na Xunta e o cumprimento do Plano de Obra do Proxecto.

En agosto de 2014 abriuse unha pista de terra compactada formando un dique para acceso de maquinaria pesada, consolidada con pedras e recuberta nas abas con terra vexetal, no LIC Gándaras de Budiño, na zona posterior do Parque de Bombeiros ocupada por vexetación acuática do ecosistema lagunar. En setembro a pista acada o centro do vaso principal da “Lagoa de Orbenlle”, zona central da antiga gran lagoa do LIC. En outubro a pista está compactada e prevese que non se retire. O obxectivo da Consellaría de Medio Ambiente, Territorio e Infraestruturas da Xunta de Galicia é deixar a pista permanentemente comprometendo gravemente o futuro do “corazón” do espazo natural.

A obra de TRAGSA, moi agresiva para a fauna e flora da lagoa das Gándaras de Budiño, realízase na área crítica de conservación de sapoconcho europeo (Emys orbicularis) no LIC. Permite un acceso innecesario, incrementando as molestias á fauna, tanto herpetolóxica como á avifauna. Facilita o acceso de cánidos, gatos, visón americano e outros depredadores. Estes dous factores reducen gravemente a zona de descanso e reprodución da avifauna residente e invernante do espazo natural: aves acuáticas de varias especies e paseriformes como a escribenta das canaveiras (Emberiza schoeniclus) que ten un Plan de Recuperación en Galicia. Ademais a pista supón unha vía de entrada de especies exóticas de fauna e flora ó corazón do LIC.

Por outra parte, a pista é de acceso público e compromete a seguridade dos transeúntes e ter risco de accidentes. Observáronse deficiencias graves na realización da escavación e no material empregado para recubrir as pistas usadas como plataforma de traballo. Detectouse a presenza de restos de lodos de corte de granito, material tóxico que non pode ser empregado como recheo. As choivas de setembro erosionaron o dique contruído e provocaron arrastre de materiais ó vaso da lagoa e zonas de asolagamento. Ademais, a contaminación crónica por remoción de materiais tóxicos, danará gravemente as redes tróficas, a lagoa e a saúde do río Louro.

Por último, as organizacións constataron que camións con terra extraída na zona foron baleirados na antiga barreira do Cerquido, propiedade privada fóra do LIC e aterrada recentemente, feito denunciado polas tres asociacións: SGHN, AHE e Verdegaia.

As tres organizacións ambientais subliñan que o “LIC Gándaras de Budiño” pertence á Rede Natura 2000 da Unión Europea (código ES1140011) e que estas actuacións, vulneran diversas normativas ambientais, como a Lei 42/2007, de 13 de decembro, do Patrimonio Natural e a Biodiversidade e a Directiva 2004/35/CE do Parlamento Europeo e do Consello, de 21 de abril de 2004, sobre responsabilidade medioambiental en relación coa prevención e reparación de danos medio ambientais.

 

Plan de Conservación do Monumento Natural "Praia das Catedrais"

Santiago-Lugo, 21-10-2014

O Monumento Natural Praia das Catedrais. creado mediante o Decreto 11/2005, recibe anualmente un elevado número de visitantes que, froito dunha deficiente xestión do uso público, desemboca nunha presenza descontrolada que afecta de xeito moi negativo e significativo tanto á percepción que os visitantes teñen do espazo natural, como á propia conservación dos valores ambientais que motivaron a súa protección legal. Estes problemas débense en boa medida a:

  • Unha deficiente delimitación que restrinxiu o M.N. Praia das Catedrais a unha superficie de apenas 29 ha.
  • Un conxunto de elementos artificiais mal concibidos (escaleira de baixada á praia, aparcadoiros, área recreativa, sendeiros e outras áreas artificializadas) que ocupan abusivamente máis dunha cuarta parte da superficie terrestre do espazo e que constitúen unha degradación paisaxística, estética e de conservación.
  • A proliferación alegal de postos de venda ambulante e de publicidade estática.
En grande medida estes problemas resolveríanse garantindo o cumprimento da lexislación vixente: Decreto 11/2005, Lei 9/2001, Lei 42/2007 (especialmente, o artigo 33.3), R.D. 630/2013 e DC 92/43/CEE e o resto resolveríanse elaborando e aplicando un Plan de Uso Público racional, sostible e comprometido cos obxectivos de conservación do espazo natural.

Pero o documento provisional de Plan de Conservación (PDF), sometido a información pública apenas durante 15 días naturais, presenta graves deficiencias e carencias de información, non cumprindo os mínimos de calidade esixible a un documento técnico. A análise da capacidade de carga é igualmente deficiente, baseada nos datos obtidos en dúas únicas xornadas de visita ao espazo. A normativa non resulta axeitada e a proposta de transformación do uso público nunha actividade de carácter administrativa e suxeita a unha autorización telemática non foi convenientemente definida e menos aínda contrastada, polo que a súa posta en marcha podería crear graves problemas en relación coa xestión do ZEC Ás Catedrais e o acceso público ao DPMT, así como ao turismo. E para rematar, o documento carece de medidas concretas de actuación, de orzamentos e dun cronograma.

Por todo o devandito, SGHN solicitou nas súas alegacións (PDF) que se retire o documento e que a DXCN aborde de forma mais participativa (abaixo - arriba) a elaboración dun novo plan coa tipoloxía dun Plan de Ordenación dos Recursos Naturais, empregando como área mínima de planificación o límite da ZEC Ás Catedrais e as zonas non catalogadas como área protexidas lindantes co actual Monumento Natural, chegando ata a liña do FEVE.

Máis...

 

Dobre premio para a campaña e o video de "Salvemos Galicia da Megaminería"

Cangas, 18-10-2014

"Salvemos Galicia da megaminería" recibiu onte os premios nas dúas categorías para as que fóra elexida finalista na 3ª Edición do Festival Social Media de Galicia: "Mellor campaña social" e "Mellor video viral" organizados por MexilOnseTuits. Os premios recolleunos o Presidente de SGHN, Serafín González, quen salientou que eran dous fermosos recoñecementos a un inmenso traballo colectivo a prol da conservación do patrimonio natural galego.

 

Queixa conxunta de AHE, SGHN e Verdegaia

Un recheo no LIC Gándaras de Budiño afecta a tres especies ameazadas

Pontevedra, 15-10-2014

A Asociación Española de Herpetogía (AHE), Verdegaia e SGHN presentaron un escrito común (PDF) polo recheo dunha barreira no Cerquido (perto das Gándaras de Budiño). Nesta barreira observáronse tres individuos de sapoconcho europeo (Emys orbicularis), especie que conta cun Plano de Recuperación da Xunta de Galicia e está catalogada como “en perigo de extinción” no Catálogo Galego de Especies Ameazadas (en adiante C.G.E.A.).  Outras especies interesantes eran o espiñento (Gasterosteus aculeatus), especie catalogada como “vulnerable” no C.G.E.A. e diversos anfibios como  limpafontes verde (Triturus marmoratus), limpafontes común (Lissotriton boscai), sapiño pinto (Discoglossus galganoi), ra patilonga (Rana iberica) catalogada como “vulnerable” no C.G.E.A., estroza (Hyla arborea), ra verde (Pelophylax perezi), sapo curriqueiro (Bufo calamita) e sendo incluso unha zona potencial de cría do sapiño de esporóns (Pelobates cultripes), en perigo de extinción no L.I.C. e catalogada como “vulnerable” no C.G.E.A.

Este recheo produciuse dende agosto e a pesares de informar o 17-09-2014 ó Consello Galego de Medio Ambiente da situación, e a pesar da presenza e actividade dos axentes de Medio Ambiente na zona, as obras non foron paralizadas para rescatar alomenos parte desta interesantes especies.

As entidades sinantes deste escrito non entenden a actitude dunha Administración que non velou sequera pola integridade física dos seus traballadores mentres estes trataban de retirar as especies que podían en medio do aterramento con centos de camións de terra mentres se traballaba contrarreloxio en condicións difíciles. Entre outros temas solicitouse á Consellería que informe das causas polas que non se seguiron as condicións determinadas no plan da obra, en especial no relativo á desecación completa do vaso da barreira e a retirada “in vivo” da fauna acuática e liberación en zona adecuada do L.I.C. previamente ao recheo.

 

AHE, SGHN e Verdegaia piden a reposición da legalidade no LIC Gándaras de Budiño

Pontevedra, 10-10-2014

A Asociación Española de Herpetogía (AHE), Verdegaia e SGHN presentaron un escrito común (PDF) pedindo a restauración da legalidade vixente no LIC de Gándaras de Budiño (O Porriño, Pontevedra).

Entre outas agresións, detectouse a posible ocupación ilegal de terreos do LIC por unha empresa. Por este motivo, solicitouse á Consellería de Medio Ambiente, Territorio e Infraestruturas que investigue o tema e en caso de confirmase as sospeitas das entidades sinantes, se proceda ás actuacións necesarias para reverter as obras.

 

"Perlas" na estrutura da Consellería de Medio Ambiente

Santiago, 01-10-2014

Reservas da Biosfera e outras figuras de espazos de ámbito internacional non incluídas explícitamente nas competencias da Subdirección Xeral de Espazos Naturais, entre as que sen embargo se inclúe unha figura preconstitucional que ben pouco ten que ver coa conservación (a “Reserva Nacional de Caza dos Ancares”) ao mesmo nivel que os Parques Naturais.

Unha Subdirección Xeral de Espazos Naturais que que terá expresamente nas súas funcións o “fomento de medidas de colaboración e coordinación nas campañas relativas á obtención da bandeira azul” pero non a colaboración e coordinación cos centros de investigación, os órganos xestores das Reservas da Biosfera e as organizacións de defensa ambiental.

Dous novos altos cargos de libre designación para centralizar en Santiago a xestión e dirección dos Parques Naturais, afastándoa das necesidades dos Parques Naturais e dos seus habitantes e visitantes..

Unha Subdirección Xeral de Biodiversidade e de Recursos Cinexéticos e Piscícolas na que só dúas das nove funcións asignadas teñen que ver coa BIODIVERSIDADE en maiúsculas:

  • “O desenvolvemento de medidas e instrumentos para a protección e conservación das especies silvestres” que aparece só en segundo lugar, por detrás de “A ordenación, conservación, protección, fomento e aproveitamento sustentable dos recursos cinexéticos e piscícolas nas augas continentais”.
  • “A elaboración e a implementación dos instrumentos de planificación, desenvolvemento e xestión das especies” que figura en séptimo, e antepenúltimo, lugar das competencias.

Estas son algunhas das "perlas" da nova estrutura da Consellería de Medio Ambiente, Territorio e Infraestruturas (Decreto 115/2014) polas que SGHN ven de dirixirse á Conselleira pedindo a súa modificación (PDF):

 

I Concurso Escolar de Debuxo “Calendario da natureza”

Pontevedra, 24-09-2014

Co fin de promover o coñecemento da natureza galega entre os escolares, e baixo os principios fundadores da Sociedade Galega de Historia Natural: “Estudar, divulgar e defender o patrimonio natural galego” a delegación de Pontevedra da SGHN convoca o I Concurso Escolar de Debuxo “Calendario da natureza”.

Este concurso está destinado a todos os alumnos que cursen 5º ou 6º de Ensino Primario durante o curso 2014-2015 na provincia de Pontevedra e establécense catro primeiros premios correspondentes ás catro categorías de participación: Categoría “Primavera”, “Verán”, “Outono” e “Inverno”. As bases completas están dispoñibles no seguinte documento (PDF).

O alumnado gañador de cada categoría recibirá un diploma acreditativo e un lote de iniciación á observación de campo: mochila, gorra, caderno de campo, lupa e pin SGHN de solapa. A mestra ou mestre coordinador da actividade do alumnado premiado recibirá un pin de solapa da SGHN. Os centros escolares do alumnado premiado recibirán un lote de publicacións da SGHN para a biblioteca escolar e un diploma acreditativo.

Os traballos premiados pasarán a formar parte dun calendario dixital que será posto á libre disposición do público na páxina web da SGHN e na páxina de facebook de SGHN Pontevedra.

 

Seica agora o Sar é afluente do Miño
e Santiago de Compostela non está na Coruña

Santiago, 19-09-2014

Pois si, algo así debe pensar a Confederación Hidrográfica do Miño-Sil (CHMS) que quere executar outra fase do saneamento de Santiago de Compostela, despois do colector do río Sar entre : Pontepedriña e a depuradora de Silvouta que realizou en 2009 cun orzamento de máis de 21 millóns de euros (véxase cartel á dereita).

Pero a realidade, a xeografía, a hidrografía e a lexislación vixente son moi teimudas e o proxecto situase na bacía hidrográfica do Ulla, unha bacía intracomunitaria que é competencia exclusiva da Xunta de Galica, que a engloba na Demarcación Hidrográfica de Galicia-Costa e a xestiona a traverso do ente Augas de Galicia. Xa que logo, o proxecto sitúase totalmente fóra do ámbito competencial da CHMS.

Pero, ademais, a CHMS e Augas de Galicia manteñen unha moi extrana relación de “proxectos cruzados” que causan perplexidade en calquera cidadán que os coñeza:

Fronte a este disparate a única alegación de SGHN ao proxecto sometido a información púbica é que a CHMS se adique a resolver os graves problemas dos ríos na bacía do Miño-Sil e do Limia, que son o ámbito das súas competencias legais segundo o RD 266/2008 polo que se creou e o RD 125/2007 polo que se fixa o ámbito das demarcacións hidrográficas.

 

Outra vez A Limia: SGHN solicita informes e plans oficiais

Ourense-Santiago, 04-09-2014

Dende hai anos e en múltiples ocasións SGHN expuxo os problemas da auga na comarca da Limia debido á contaminación difusa de orixe agrogandeiro e que se estenden augas abaixo polo menos ata o encoro de As Conchas. Todos os datos e análises ata agora coñecidos veñen a corroborar esta afirmación, o cal é lóxico pois baste dicir que na chaira de Antela comen, beben e defecan unha morea de porcos e galiñas, vacas e coellos, todos estabulados en macro-granxas industriais:

  • A produción de feces e ouriños é de 1,35 kg/día no caso do home, 4 kg/día nos porcos adultos, 28 kg/día nas vacas adultas para produción de carne, 45 kg/día en vacas leiteiras, 7 kg/día en terneiros, 100 g/día en galiñas ponedoras e 60 g/día en polos de carne.
  • As táboas de conversión das distintas especies gandeiras a Unidades de Gando Maior (UGM: o equivalente a vacas adultas) indican que en A Limia hai actualmente entre 70.000 e 75.000 UGM de gando estabulado en granxas industriais que en total, a 28 kg/día cada unha, producen entre 2.000 e 2.100 toneladas diarias de zurros e estercos, é dicir, unha cantidade de feces e ouriños semellante a que se xenera nunha cidade de 1,3 a 1,5 millóns de persoas ou, o que é mesmo, a metade da poboación de Galicia.

Carga gandeira estabulada en macro-granxas industriais na Limia

Dende o punto de vista da xeración de residuos, esta enorme "poboación humana equivalente" en forma de gando estabulado contrasta coa cativa "poboación humana real" de tódolos concellos da bacía do río Limia en Ourense (35.000 persoas). Unha simple regla de tres indica que alomenos o 97% dos vertidos xerados procederían do sector agrogandeiro das macro-granxas industriais. Para comparar e contrastar resultados, SGHN acaba de pedir á Confederación Hidrográfica do Miño-Sil (PDF) o informe que sobre o tema encargou ao Consejo Superior de Investigaciones Científicas (CSIC), que aportará sen dúbida datos relevantes en relación coa orixe do problema e as súas repercusións.

Ademais do caso concreto da contaminación do recurso auga, SGHN tamén está preocupada pola xestión humana dos restantes recursos naturais da Limia, polo que ven de insistir diante da Consellería de Medio Ambiente, Territorio e Infraestruturas para que dunha vez por todas cumpra as súas propias directrices e publique o Plan de Ordenación dos Recursos Naturais da ZEPA da Limia (PDF). Pois o atraso (xa de tres anos!!!) na súa aprobación produce un baleiro legal que dificulta a toma de decisións polos axentes implicados e multiplica innecesariamente os problemas socioambientais da comarca e a incerteza da poboación.

Con todo SGHN entende que outra Limia é posible e que se pode compatibilizar a conservación ambiental coas actividades agrogandeiras, e niso segue traballando.

 

Autovía A-57
qué pensan os partidos deste despropósito?

 

Pontevedra, 27-08-2014

A SGHN ven de enviar ós cinco partidos/coalicións con representación no Parlamento galego cadansúa carta (PDF) solicitando o seu posiciomento sobre a nova autovía A-57 que se quere construír na provincia de Pontevedra. A día de hoxe SGHN só recibiu contestación dun deles e en breve penduraremos desta web os PDF das respostas que recibamos.

SGHN considera que un gasto de partida de 430 millóns de euros carece de senso cando se está a deixar de investir en investigación, sanidade e educación. Un proxecto irreflexivo cando existen servizos de comunicación alternativos en funcionamento e mellorables.

¿Cal é a alternativa da SGHN?

Investir este importe económico na mellora do trazado (seguridade) da actual N-550 e xunto cos cartos da ampliación da AP-9 e subvencións de tramos da AP-9 (p. ex. do Morrazo a Vigo), revertir completamente a AP-9 á rede de estradas do estado, liberadas de peaxes e sen financións a empresas privadas. Na imaxe en raiado verde a alternativa proposta e en azul algúns dos proxectos de novas autovías.

 

Concello e Consellería non respostan nin aos ofrecementos de colaboración

SGHN pide amparo ao Valedor para protexer ao Cerambyx cerdo en Caldas

Pontevedra, 18-08-2014

Lamentable e novamente a SGHN tivo que recurrir ó Valedor do Pobo (PDF-1, PDF-2) para que a administración dea contestación ós escritos presentados. Nesta ocasión trátase de sendos escritos presentados o 07-02-2014 diante da Consellería de Medio Ambiente (PDF) e o Concello de Caldas (PDF) por mor da intención do concello de Caldas de Reis (Pontevedra) de eliminar a presenza do legalmente protexido Cerambyx cerdo dunha carballeira sita nesta vila.

Os primeiros escritos seguén sen contestación a pesares do ofrecemento de colaboración da SGHN (máis...).

 

 

Fitos 40 anos Hitos 40 años

Hoxe, como hai 40 anos, a túa axuda é imprescindible para defender a nosa natureza

 

 

 

OUTRAS NOVIDADES

SGHN-Mamíferos mariños na limpeza dos fondos de Curuxeiras

Efemérides astronómicas novembro

Punteiros celestes: Alpheratz

Reglamento UE Nº 1143/2014especies exóticas invasoras

Modificación Directiva Marco Auga

Lei 8/2014 Proteccion animais domesticos e salvaxes en catividade

Efemérides astronómicas outubro

Punteiros celestes: Fomalhaut

Estrategia española conservación diversidade vexetal

ENIL Sistema dunar Praia América-Panxón

Modificación Ley Responsabilidad medioambiental

Directiva 2014/80/UE protección augas soterráneas

RD 416/2014 Turismo natureza e biodiversidade

Xeira naturalista ás Gándaras de Budiño, 1 de xuño

Catalogación de Cheilanthes guanchica en perigo de
extinción

Decreto 37/2014: Plan Director Rede Natura 2000

Actividades SGHN Xunta Directiva Xeral 2013

Actividades SGHN-Ourense 2013

Actividades SGHN-Sección Antela 2013

Plan de conservación da Píllara das dunas

Lei 13/2013 de Caza de Galicia

Ley 21/2013, de 9 de diciembre, de evaluación ambiental

Ley 19/2013 de Transparencia, acceso información pública y buen gobierno

SENTENCIA PRESTIGE

Fractura hidráulica ("fracking")

Sentenza UE: Prohibición produtos derivados da caza de focas

Antela: un conto de verdade

RD 630/2013, novo Catálogo especies exóticas invasoras

Necesítanse máis presas para controlar as enchentes?

Ley 2/2013. Modificación Ley de Costas

Resolución Parlamento UE Bosques e cambio climático

Alegacións de SGHN a 108 parques eólicos

Paspallás nº 41 en PDF